您的購物袋內沒有商品！
會員中心
收藏
訂單記錄
話說今年6月睇完fes返黎，差唔多有兩三個月冇開新野聽，對音樂完全冇好奇心，聽覺疲勞。然後某日youtube推左bloodthristy butcher嘅七月live俾我，係完全冇期望嘅情況下，呢條live俾我一種「屌，我好希望當時係現場」嘅感覺。
我反覆睇左好多次，一直到依家12月，都仲係覺得呢段live好撚有力量。我嘗試拆解：佢地玩嘅野爛撻撻又冇令人上口嘅melody，同「好聽」完全係背道而馳，究竟個魅力係邊。
後來我發現就係因為佢地玩得「唔正確」先顯得咁有力量，主唱吉村秀樹唱得甚不自在甚至可以形容係痛苦，但佢地流露出一份難以被打磨嘅真摯。睇返歌詞，〈七月〉係講一次游水嘅經歷，游游下醒起上年同樣時份仲同對方一齊游緊水，佢感歎點解所有野都好似眼前水咁話走就走捉都捉唔住，覺得自己身處其中好唔自在，頓然情緒排山倒海咁湧過黎﹐個下停頓爆發就好似深呼吸一口空氣然後直衝到水底最深處，期間不斷噴出氧氣至腦昏身亂，透過音樂竟然做到如此暢快嘅體驗，神奇。當然有部分要歸功number girl結他手田渕ひさ子嘅加入，將現場嘅情感放大。
但係呢段live d台上台下定係mon前睇都聽到個人著撚哂火。
呢首〈七月〉出至《Kocorono》（心的）嘅其中一首，成隻碟都係以月份為歌名，以2月開始一路玩返去1月最後再用一首<kocorono>收尾，其實就係以年月嘅線性前進做一個心路歷程，講點樣get through一個對象。我覺得係公路唱片嘅經典。（按：我對公路唱片的定義並非駕駛/旅程途中播放的歌曲，而是專輯本身有一個完整的心理歷程。）
雖然係咁，但係我覺得出至minialbum《△》嘅〈6月と列車〉我覺得先係同〈七月〉有所連接，個份情感carry得更好，有興趣可以聽下。
《Kocorono》顯然唔係佢地最出色嘅專輯，但作為認識佢地嘅起始點，呢隻係不二之選。與之比較，我覺得之後嘅《未完成》係混沌之中透光的傑作、《△》份量唔輸大碟的minialbum、妻子田渕ひさ子03年以結他手身份加入樂團後嘅《birdy》多左一份調和感，《無題》更有一份塵埃落定的感動。最remarkable當數樂隊最後一張大碟《青春》，13年5月46歲吉村秀樹死於急性心臟衰竭，留下遺作大碟《青春》﹐連演出的機會未有，便要將其歌詞中「青春的殘渣」形象永久冷藏於音樂之中。
係到特別推薦鼓手小松正宏的Side Project 純樂器組合 SOSITE，展現了與Bloodthrisy Butchers截然不同的魅力。值得一聽。
Bloodthrisy Butchers成員甚少變更，89年第一張大碟面世前就已經定好了Bass+Drum+Guitar的成員，一直到2013長達24之久未曾斷過。惟吉村秀樹妻子 田渕ひさ子在03年Number Girl停止活動後以結他手身份加入，稍稍改變了樂隊的Dynamic。
吉村秀樹同射守矢雄原本係一個由樂團LSD成員湊成的樂團「畜生」，後來分裂成Bloodthrisy Butchers同怒髲天，加上多次共演的Eastern Youth，呢幾隊札幌樂隊主導住當地嘅Punk/Hardcore發展。
主音本身份人難相處，郁啲就話係人錯、諸多不滿，但係一玩起音樂上，撚住啲唔太悅耳但表達到自己嘅結他聲，佢會適當地放鬆返個人，將自己放到最大。Bloodthrisy Butchers唔係神band，但係喺band界就有好特別嘅地位，因為佢哋音樂擁有個份原真係有幾高音樂技巧都複製唔黎的。
啲人話人到左而立之年會對新野失去興趣，我臨去到呢個階段好好彩地俾佢地拉返返黎，無為左取悅邊個而妥協，一直做自己。係如果做大人係要聽正常歌講悅耳講chill，咁我寧願一路錯落去。
=====================
圖文：梅迪斯
佳Essential
憑香港此地資訊吸收力之廣，理應加以善用，一拓視野。效法rough trade essential的做法，私自表揚更不分域界的all time classic，將我地認為值得留意嘅音樂留個名分，提供一個起點俾各位樂迷。
